Choose a chapter

Hebrews 3

1 Ⲉⲑⲃⲉⲫⲁⲓ ⲛⲁⲥⲛⲏⲟⲩ ⲛⲁⲅⲓⲟⲥ ⲟⲩⲟϩ ⲛϣⲫⲏ ⲣⲛⲧⲉ ⲡⲓⲑⲱϩⲉⲙ ⲛⲧⲉ ⲧⲫⲉ ⲙⲁⲓⲁⲧⲉⲛ ⲑⲏⲛⲟⲩ ⲙⲡⲓⲁⲡⲟⲥⲧⲟⲗⲟⲥ ⲟⲩⲟϩ ⲛⲁⲣⲭⲏⲉⲣⲉⲩⲥ ⲛⲧⲉ ⲡⲉⲛⲟⲩⲱⲛϩ ⲉⲃⲟⲗ Ⲓⲏⲥⲟⲩⲥ. 2 Ⲫⲁⲓ ⲉⲧⲉⲛϩⲟⲧ ⲙⲫⲏ ⲉⲧⲁϥⲑⲁⲙⲓⲟϥ ⲕⲁⲧⲁ ⲫⲣⲏϯ ϩⲱϥ ⲙⲘⲱⲩⲥⲏⲥ ⲉϩⲣⲏⲓ ⲉϫⲉⲛ ⲡⲉϥⲏⲓ. 3 Ⲁⲫⲁⲓ ⲅⲁⲣ ⲙⲡϣⲁ ⲛϩⲟⲩⲟ ⲧⲁⲓⲟ ⲉϩⲟⲧⲉ Ⲙⲱⲩⲥⲏⲥ ⲕⲁⲧⲁ ⲫⲣⲏϯ ⲉⲧⲉ ⲟⲩⲟⲛⲧⲁϥ ⲙⲙⲁⲩ ⲛϩⲟⲩⲟ ⲧⲁⲓⲟ ⲉϩⲟⲧⲉ ⲡⲓⲏⲓ ⲛϫⲉ ⲫⲏ ⲉⲧⲁϥⲑⲁⲙⲓⲟϥ. 4 Ⲏⲓ ⲅⲁⲣ ⲛⲓⲃⲉⲛ ⲉϣⲁⲩⲥⲉⲃⲧⲟⲧⲟⲩ ⲉⲃⲟⲗ ϩⲓⲧⲉⲛ ⲟⲩⲁⲓ ⲫⲏ ⲇⲉ ⲉⲧⲁϥⲑⲁⲙⲓⲉ ⲉⲛⲭⲁⲓ ⲛⲓⲃⲉⲛ Ⲫⲛⲟⲩϯ ⲡⲉ. 5 Ⲟⲩⲟϩ Ⲙⲱⲩⲥⲏⲥ ⲙⲉⲛ ϥⲉⲛϩⲟⲧ ϧⲉⲛ ⲡⲉϥⲏⲓ ⲧⲏⲣϥ ⲙⲫⲣⲏϯ ⲛⲟⲩⲃⲱⲕ ⲉⲩⲙⲉⲧⲙⲉⲑⲣⲉ ⲛⲛⲏ ⲉⲧⲟⲩⲥⲁϫⲓ ⲙⲙⲱⲟⲩ. 6 Ⲡⲭⲣⲓⲥⲧⲟⲥ ⲇⲉ ⲙⲫⲣⲏϯ ⲛⲟⲩϣⲏⲣⲓ ⲉϫⲉⲛ ⲡⲉϥⲏⲓ ⲉⲧⲉ ⲁⲛⲟⲛ ⲡⲉ ⲡⲉϥⲏⲓ ⲉϣⲱⲡ ⲁⲛϣⲁⲛⲁⲙⲟⲛⲓ ⲙⲡⲓⲟⲩⲱⲛϩ ⲉⲃⲟⲗ ⲛⲉⲙ ⲡⲓϣⲟⲩϣⲟⲩ ⲛⲧⲉ ϯϩⲉⲗⲡⲓⲥ ⲉϥⲧⲁϫⲣⲏⲟⲩⲧ ϣⲁ ⲉⲃⲟⲗ.

7 Ⲕⲁⲧⲁ ⲫⲣⲏϯ ⲉⲧⲉϥϫⲱ ⲙⲙⲟⲥ ⲛϫⲉ Ⲡⲓⲡⲛⲉⲩⲙⲁ ⲉⲑⲟⲩⲁⲃ ϫⲉ ⲙⲫⲟⲟⲩ ⲉϣⲱⲡ ⲁⲣⲉⲧⲉⲛϣⲁⲛⲥⲱⲧⲉⲙ ⲉⲧⲉϥⲥⲙⲏ 8 Ⲙⲡⲉⲣϯⲛϣⲱⲧ ⲛϫⲉ ⲛⲉⲧⲉⲛϩⲏⲧ ⲙⲫⲣⲏϯ ϧⲉⲛ ⲡⲓϫⲱⲛⲧ ⲕⲁⲧⲁ ⲡⲓⲉϩⲟⲟⲩ ⲛⲧⲉ ⲡⲓⲡⲓⲣⲁⲥⲙⲟⲥ ⲛϩⲣⲏⲓ ϩⲓ ⲡϣⲁϥⲉ 9 Ⲫⲏ ⲉⲧⲁⲩⲉⲣⲡⲓⲣⲁⲍⲓⲛ ⲙⲙⲟⲓ ⲛϧⲏⲧϥ ⲛϫⲉ ⲛⲉⲧⲉⲛⲓⲟϯ ϧⲉⲛ ⲟⲩϭⲱⲛⲧ ⲁⲩⲛⲁⲩ ⲉⲛⲁϩⲃⲏⲟⲩⲓ 10 Ⲛⲙ ⲛⲣⲟⲙⲡⲓ ⲉⲑⲃⲉⲫⲁⲓ ⲁⲓⲙⲉⲥⲧⲉ ⲡⲓϫⲱⲟⲩ ⲉⲧⲉⲙⲙⲁⲩ ⲟⲩⲟϩ ⲁⲓϫⲟⲥ ϫⲉ ⲥⲉⲥⲱⲣⲉⲙ ϧⲉⲛ ⲡⲟⲩϩⲏⲧ ⲛⲥⲏⲟⲩ ⲛⲓⲃⲉⲛ ⲛⲑⲱⲟⲩ ⲇⲉ ⲙⲡⲟⲩⲥⲟⲩⲉⲛ ⲛⲁⲙⲱⲓⲧ 11 Ⲙⲫⲣⲏϯ ⲉⲧⲁⲓⲱⲣⲕ ϧⲉⲛ ⲡⲁϫⲱⲛⲧ ϫⲉ ⲁⲛ ⲥⲉⲛⲁϣⲉ ⲉϧⲟⲩⲛ ⲉⲡⲁⲙⲁ ⲛⲉⲙⲧⲟⲛ. 12 Ⲁⲛⲁⲩ ϫⲉ ⲛⲁⲥⲛⲏⲟⲩ ⲙⲏⲡⲟⲧⲉ ⲛⲧⲉ ⲟⲩϩⲏⲧ ⲉϥϩⲱⲟⲩ ϣⲱⲡⲓ ϧⲉⲛ ⲟⲩⲁⲓ ⲙⲙⲱⲧⲉⲛ ⲛⲧⲉ ⲟⲩⲙⲉⲧⲁⲑⲛⲁϩϯ ⲉⲑⲣⲉⲧⲉⲛϩⲉⲛ ⲑⲏⲛⲟⲩ ⲉⲃⲟⲗ ϩⲁ Ⲫⲛⲟⲩϯ ⲉⲧⲟⲛϧ. 13 Ⲁⲗⲗⲁ ⲙⲁⲛⲟⲙϯ ⲛⲛⲉⲧⲉⲛⲉⲣⲏⲟⲩ ⲙⲙⲏⲛⲓ ϣⲁ ⲫⲏ ⲉⲧⲟⲩⲙⲟⲩϯ ⲉⲣⲟϥ ϫⲉ ⲫⲟⲟⲩ ϩⲓⲛⲁ ⲛⲧⲉϣⲧⲉⲙ ⲟⲩⲁⲓ ⲉⲃⲟⲗ ϧⲉⲛ ⲑⲏⲛⲟⲩ ⲉⲛϣⲱⲧ ϧⲉⲛ ⲟⲩⲁⲡⲁⲧⲏ ⲛⲧⲉ ⲫⲛⲟⲃⲓ. 14 Ⲁⲛⲉⲣϣⲫⲏⲣ ⲅⲁⲣ ⲡⲉ ⲉⲠⲭⲣⲓⲥⲧⲟⲥ ⲉϣⲱⲡ ⲁⲛϣⲁⲛⲁⲙⲟⲛⲓ ⲛⲧⲁⲣⲭⲏ ⲛϯϩⲩⲡⲟⲥⲧⲁⲥⲓⲥ ϣⲁ ⲉⲃⲟⲗ ⲉⲥⲧⲁϫⲣⲏⲟⲩⲧ. 15 Ϧⲉⲛ ⲡϫⲓⲛϫⲟⲥ ϫⲉ ⲙⲫⲟⲟⲩ ⲉϣⲱⲡ ⲁⲣⲉⲧⲉⲛϣⲁⲛⲥⲱⲧⲉⲙ ⲉⲧⲉϥⲥⲙⲏ ⲙⲡⲉⲣϯⲉⲛϣⲱⲧ ⲛϫⲉ ⲛⲉⲧⲉⲛϩⲏⲧ ⲙⲫⲣⲏϯ ⲛϧⲣⲏⲓ ϧⲉⲛ ⲡⲓϫⲱⲛⲧ. 16 Ϩⲁⲛⲟⲩⲟⲛ ⲅⲁⲣ ⲉⲧⲁⲩⲥⲱⲧⲉⲙ ⲁⲩϯϫⲱⲛⲧ ⲁⲗⲗⲁ ⲟⲩⲟⲛ ⲛⲓⲃⲉⲛ ⲁⲛ ⲉⲧⲁⲩⲓ ⲉⲃⲟⲗ ϧⲉⲛ Ⲭⲏⲙⲓ ⲉⲃⲟⲗ ϩⲓⲧⲉⲛ Ⲙⲱⲩⲥⲏⲥ. 17 Ⲛⲓⲙ ⲇⲉ ⲛⲉⲛⲏ ⲉⲧⲁϥϩⲣⲟϣ ⲉⲣⲱⲟⲩ ⲛⲙⲛⲣⲟⲙⲡⲓ ⲙⲏ ⲛⲏ ⲁⲛ ⲛⲉⲉⲧⲁⲩⲉⲣⲛⲟⲃⲓ ⲛⲏ ⲉⲧⲁ ⲛⲟⲩⲕⲉⲗⲓ ϩⲉⲓ ϩⲓ ⲡϣⲁϥⲉ. 18 Ⲛⲓⲙ ⲇⲉ ⲛⲉⲛⲏ ⲉⲧⲁϥⲱⲣⲕ ⲛⲱⲟⲩ ⲉϣⲧⲉⲙⲓ ⲉϧⲟⲩⲛ ⲉⲡⲉϥⲙⲁ ⲛⲉⲙⲧⲟⲛ ⲙⲏ ⲛⲏ ⲁⲛ ⲛⲉⲉⲧⲁⲩⲉⲣⲁⲧⲥⲱⲧⲉⲙ. 19 Ⲟⲩⲟϩ ⲧⲉⲛⲛⲁⲩ ϫⲉ ⲙⲡⲟⲩϣϫⲉⲙϫⲟⲙ ⲛⲓ ⲉϧⲟⲩⲛ ⲉⲑⲃⲉ ⲧⲟⲩⲙⲉⲧⲁⲑⲛⲁϩϯ.