Choose a chapter

2 Timothy 2

1 Ⲛⲑⲟⲕ ⲟⲩⲛ ⲡⲁϣⲏⲣⲓ ϫⲉⲙⲛⲟⲙϯ ϧⲉⲛ ⲡⲓϩⲙⲟⲧ ⲉⲧϧⲉⲛ Ⲡⲭⲣⲓⲥⲧⲟⲥ Ⲓⲏⲥⲟⲩⲥ. 2 Ⲛⲏ ⲉⲧⲁⲕⲥⲟⲑⲙⲟⲩ ⲛⲧⲟⲧ ⲉⲃⲟⲗ ϩⲓⲧⲉⲛ ⲟⲩⲙⲏϣ ⲙⲙⲉⲑⲣⲉ ⲛⲁⲓ ⲭⲁⲩ ϧⲁⲧⲟⲧⲟⲩ ⲛϩⲁⲛⲡⲓⲥⲧⲟⲥ ⲛⲣⲱⲙⲓ ⲛⲁⲓ ⲉⲑⲛⲁⲙⲡϣⲁ ⲛϯⲥⲃⲱ ⲛϩⲁⲛⲕⲉⲭⲱⲟⲩⲛⲓ. 3 Ⲁⲣⲓϣⲫⲏⲣ ⲛϣⲉⲡⲙⲕⲁϩ ⲙⲫⲣⲏϯ ⲛⲟⲩⲙⲁⲧⲟⲓ ⲉⲛⲁⲛⲉϥ ⲛⲧⲉ Ⲡⲭⲣⲓⲥⲧⲟⲥ Ⲓⲏⲥⲟⲩⲥ. 4 Ⲙⲡⲁⲣⲉ ϩⲗⲓ ⲉϥⲟⲓ ⲙⲙⲁⲧⲟⲓ ϭⲗⲉⲙⲗⲱⲙϥ ϧⲉⲛ ⲛⲓϩⲃⲏⲟⲩⲓ ⲛⲧⲉ ⲡⲁⲓⲱⲛϧ ϩⲓⲛⲁ ⲛⲧⲉϥⲣⲁⲛⲁϥ ⲙⲫⲏ ⲉⲧⲁϥϧⲟⲕϥ. 5 Ⲉϣⲱⲡ ⲇⲉ ⲁⲣⲉϣⲁⲛ ⲟⲩⲁⲓ ϣⲉ ⲉⲫⲙⲁ ⲛϯ ⲙⲡⲁϥϭⲓⲭⲗⲟⲙ ⲁϥϣⲧⲉⲙϯ ⲛⲟⲙⲓⲙⲟⲥ. 6 Ⲡⲓⲟⲩⲱⲓ ⲉⲧϧⲟⲥⲓ ϩⲱϯ ⲉⲣⲟϥ ⲛⲧⲉϥϭⲓ ⲛϣⲟⲣⲡ ⲉⲃⲟⲗ ϧⲉⲛ ⲛⲓⲟⲩⲧⲁϩ. 7 Ⲕⲁϯ ⲉⲛⲏ ⲉϯϫⲱ ⲙⲙⲱⲟⲩ Ⲡϭⲟⲓⲥ ⲅⲁⲣ ⲉϥⲉϯ ⲛⲁⲕ ⲛⲟⲩⲉⲙⲓ ϧⲉⲛ ϩⲱⲃ ⲛⲓⲃⲉⲛ.

8 Ⲁⲣⲓⲫⲙⲉⲩⲓ ⲛⲒⲏⲥⲟⲩⲥ Ⲡⲭⲣⲓⲥⲧⲟⲥ ⲉⲧⲁϥⲧⲱⲛϥ ⲉⲃⲟⲗ ϧⲉⲛ ⲛⲏ ⲉⲑⲙⲱⲟⲩⲧ ⲉⲃⲟⲗ ϧⲉⲛ ⲡϫⲣⲟϫ ⲛⲆⲁⲩⲓⲇ ⲕⲁⲧⲁ ⲡⲁⲉⲩⲁⲅⲅⲉⲗⲓⲟⲛ 9 ⲫⲁⲓ ⲉϯϭⲓⲙⲕⲁϩ ⲛϧⲏⲧϥ ϣⲁ ⲉϧⲟⲩⲛ ⲉϩⲁⲛⲥⲛⲁⲩϩ ⲙⲫⲣⲏϯ ⲛⲟⲩⲣⲉϥⲉⲣⲡⲉⲧϩⲱⲟⲩ ⲁⲗⲗⲁ ⲡⲥⲁϫⲓ ⲙⲪⲛⲟⲩϯ ⲥⲟⲛϩ ⲁⲛ. 10 Ⲉⲑⲃⲉⲫⲁⲓ ϯⲉⲣϩⲩⲡⲟⲙⲉⲛⲓⲛ ϧⲉⲛ ϩⲱⲃ ⲛⲓⲃⲉⲛ ⲉⲑⲃⲉ ⲛⲓⲥⲱⲧⲡ ϩⲓⲛⲁ ⲛⲧⲉ ⲧⲟⲧⲟⲩ ϭⲓ ⲙⲡⲓⲟⲩϫⲁⲓ ⲉⲧϧⲉⲛ Ⲡⲭⲣⲓⲥⲧⲟⲥ Ⲓⲏⲥⲟⲩⲥ ⲛⲉⲙ ⲡⲓⲱⲟⲩ ⲛⲉⲛⲉϩ. 11 Ϥⲉⲛϩⲟⲧ ⲛϫⲉ ⲡⲥⲁϫⲓ ⲓⲥϫⲉ ⲅⲁⲣ ⲁⲛⲙⲟⲩ ⲛⲉⲙⲁϥ ⲓⲉ ⲧⲉⲛⲛⲁⲱⲛϧ ⲛⲉⲙⲁϥ ⲟⲛ 12 Ⲓⲥϫⲉ ⲧⲉⲛⲛⲁⲉⲣϩⲩⲡⲟⲙⲉⲛⲓⲛ ⲓⲉ ⲧⲉⲛⲛⲁⲉⲣⲟⲩⲣⲟ ⲛⲉⲙⲁϥ ⲟⲛ ⲓⲥϫⲉ ⲧⲉⲛⲛⲁϫⲟⲗϥ ⲉⲃⲟⲗ ⲛⲑⲟϥ ϩⲱϥ ϥⲛⲁϫⲟⲗⲧⲉⲛ ⲉⲃⲟⲗ 13 Ⲓⲥϫⲉ ⲧⲉⲛⲛⲁⲉⲣⲁⲑⲛⲁϩϯ ⲫⲏ ⲛⲑⲟϥ ϥⲛⲁⲟϩⲓ ⲉϥⲟⲓ ⲙⲡⲓⲥⲧⲟⲥ ⲙⲙⲟⲛ ϣϫⲟⲙ ⲅⲁⲣ ⲛⲧⲉϥϫⲟⲗϥ ⲉⲃⲟⲗ ⲙⲙⲁⲩⲁⲧϥ.

14 Ⲙⲁⲫⲙⲉⲩⲓ ⲛⲱⲟⲩ ⲛⲛⲁⲓ ⲉⲕⲉⲣⲙⲉⲑⲣⲉ ⲙⲡⲉⲙⲑⲟ ⲙⲫⲛⲟⲩϯ ⲉϣⲧⲉⲙⲙⲗⲁϧ ϧⲉⲛ ⲡⲥⲁϫⲓ ⲉϫⲉⲛ ϩⲗⲓ ⲛϩⲱⲃ ⲙⲙⲟⲛ ϩⲏⲟⲩ ⲛϧⲏⲧⲕ ⲉⲟⲩⲱϫⲡ ⲛⲛⲏ ⲉⲧⲥⲱⲧⲉⲙ. 15 Ⲓⲏⲥⲟⲩⲥ ⲙⲙⲟⲕ ⲉⲧⲁϩⲟⲕ ⲉⲣⲁⲧⲕ ⲛⲟⲩⲥⲱⲧⲡ ⲙⲪⲛⲟⲩϯ ⲛⲟⲩⲉⲣⲅⲁⲧⲏⲥ ⲙⲡⲁϥϭⲓϣⲓⲡⲓ ⲉⲕϣⲱⲧ ⲙⲡⲥⲁϫⲓ ⲛϯⲙⲉⲑⲙⲏⲓ ⲉⲃⲟⲗ ϧⲉⲛ ⲟⲩⲥⲱⲟⲩⲧⲉⲛ. 16 Ⲛⲓⲥⲙⲏ ⲇⲉ ⲉⲧⲥⲟϥ ⲟⲩⲟϩ ⲉⲧϣⲟⲩⲓⲧ ϩⲉⲛⲕ ⲉⲃⲟⲗ ⲙⲙⲱⲟⲩ ϧⲉⲛ ⲟⲩϩⲟⲩⲟ ⲅⲁⲣ ϣⲁⲩⲉⲣⲡⲣⲟⲕⲟⲡⲧⲓⲛ ϧⲉⲛ ⲟⲩⲙⲉⲧⲁⲥⲉⲃⲏⲥ. 17 Ⲟⲩⲟϩ ⲛⲟⲩⲥⲁϫⲓ ϣⲁϥϫⲉⲙⲙⲁ ⲛⲙⲟⲛⲓ ⲙⲫⲣⲏϯ ⲛⲟⲩⲁⲙⲉϯ ⲉⲥⲟⲩⲱⲙ ⲉⲧⲉ ⲉⲃⲟⲗ ⲛϧⲏ ⲧⲟⲩ ⲡⲉ ϩⲩⲙⲉⲛⲉⲟⲥ ⲛⲉⲙ ⲫⲩⲗⲉⲧⲟⲥ. 18 Ⲛⲁⲓ ⲉⲧⲉ ⲙⲡⲟⲩϯⲙⲁϯ ϧⲉⲛ ⲑⲙⲏⲓ ⲉⲩϫⲱ ⲙⲙⲟⲥ ϫⲉ ϩⲏⲇⲏ ⲁⲧⲁⲛⲁⲥⲧⲁⲥⲓⲥ ⲁⲥⲟⲩⲱ ⲁⲥϣⲱⲡⲓ ⲟⲩⲟϩ ⲥⲉⲫⲱⲛϩ ⲙⲫⲛⲁϩϯ ⲛⲧⲉ ϩⲁⲛⲕⲉⲭⲱⲟⲩⲛⲓ ⲉⲃⲟⲗ.

19 Ϯⲥⲉⲛϯ ⲙⲉⲛⲧⲟⲓ ⲉⲧⲧⲁϫⲣⲏⲟⲩⲧ ⲛⲧⲉ Ⲫⲛⲟⲩϯ ⲥⲟϩⲓ ⲉⲣⲁⲧⲥ ⲉⲟⲩⲟⲛⲧⲁⲥ ⲙⲙⲁⲩ ⲛⲧⲁⲓⲥⲫⲣⲁⲅⲓⲥ ⲁⲠϭⲟⲓⲥ ⲥⲟⲩⲉⲛ ⲛⲏ ⲉⲧⲉⲛⲟⲩϥ ⲙⲁⲣⲟⲩϩⲉⲛⲟⲩ ⲥⲁⲃⲟⲗ ⲙⲡϭⲓⲛϫⲟⲛⲥ ⲛϫⲉ ⲟⲩⲟⲛ ⲛⲓⲃⲉⲛ ⲉⲧϫⲱ ⲙⲫⲣⲁⲛ ⲙⲠϭⲟⲓⲥ. 20 Ϧⲉⲛ ⲟⲩⲛⲓϣϯ ⲇⲉ ⲛⲏⲓ ϩⲁⲛⲥⲕⲉⲩⲟⲥ ⲛⲛⲟⲩⲃ ⲙⲙⲁⲩⲁⲧⲟⲩ ⲁⲛ ⲛⲉⲙ ϩⲁⲛϩⲁⲧ ⲉⲧⲉⲛϧⲏ ⲧϥ ⲁⲗⲗⲁ ⲟⲩⲟⲛ ϩⲁⲛⲕⲉϣⲉ ⲟⲛ ⲛⲉⲙ ϩⲁⲛⲃⲉⲗϫ ϩⲁⲛⲟⲩⲟⲛ ⲙⲉⲛ ⲉⲩⲭⲏ ⲉⲡⲧⲁⲓⲟ ϩⲁⲛⲕⲉⲭⲱⲟⲩⲛⲓ ⲇⲉ ⲉⲩⲭⲏ ⲉⲩϣⲱϣ. 21 Ⲉϣⲱⲡ ⲟⲩⲛ ⲁⲣⲉϣⲁⲛ ⲟⲩⲁⲓ ⲧⲟⲩⲃⲟϥ ⲥⲁⲃⲟⲗ ⲛⲛⲁⲓ ⲧⲏⲣⲟⲩ ⲉϥⲉϣⲱⲡⲓ ⲛⲟⲩⲥⲕⲉⲩⲟⲥ ⲉⲡⲧⲁⲓⲟ ⲉϥⲧⲟⲩⲃⲏⲟⲩⲧ ⲉϥⲟⲓ ⲛϣⲁⲩ ⲙⲡⲉϥⲛⲏⲃ ⲉϥⲥⲉⲃⲧⲱⲧ ⲉϩⲱⲃ ⲛⲓⲃⲉⲛ ⲉⲑⲛⲁⲛⲉⲩ.

22 Ⲛⲓⲉⲡⲓⲑⲩⲙⲓⲁ ⲛⲁⲗⲟⲩ ϩⲉⲛⲕ ⲉⲃⲟⲗ ⲙⲙⲱⲟⲩ ϭⲟϫⲓ ⲇⲉ ⲛⲥⲁϯⲙⲉⲑⲙⲏⲓ ⲡⲓⲛⲁϩϯ ϯⲁⲅⲁⲡⲏ ϯϩⲓⲣⲏⲛⲏ ⲛⲉⲙ ⲟⲩⲟⲛ ⲛⲓⲃⲉⲛ ⲉⲧⲱϣ ⲟⲩⲃⲉ ⲫⲣⲁⲛ ⲙⲠϭⲟⲓⲥ ⲉⲃⲟⲗ ϧⲉⲛ ⲟⲩϩⲏⲧ ⲉϥⲧⲟⲩⲃⲏ ⲟⲩⲧ. 23 Ⲛⲓⲕⲱϯ ⲇⲉ ⲙⲙⲉⲧⲥⲟϫ ⲟⲩⲟϩ ⲙⲙⲉⲧⲁⲧⲥⲃⲱ ϩⲉⲛⲕ ⲉⲃⲟⲗ ⲙⲙⲱⲟⲩ ⲉⲕⲉⲉⲙⲓ ⲉⲫⲁⲓ ϫⲉ ϣⲁⲩϫⲫⲉ ϩⲁⲛϣⲱⲛⲧ. 24 Ⲟⲩⲃⲱⲕ ⲇⲉ ⲛⲧⲉ Ⲡϭⲟⲓⲥ ⲥϣⲉ ⲛⲁϥ ⲁⲛ ⲉⲑⲣⲉϥⲙⲗⲁϧ ⲁⲗⲗⲁ ⲉϣⲱⲡⲓ ⲉϥⲟⲓ ⲛⲣⲉⲙⲣⲁⲩϣ ⲛⲉⲙ ⲟⲩⲟⲛ ⲛⲓⲃⲉⲛ ⲛⲣⲉϥⲥⲃⲱ ⲛⲣⲉϥⲉⲣⲁⲛⲉⲭ ⲉⲥⲑⲉ ⲙⲡⲓⲡⲉⲧϩⲱⲟⲩ. 25 Ⲉϥϯⲥⲃⲱ ϧⲉⲛ ⲟⲩⲙⲉⲧⲣⲉⲙⲣⲁⲩϣ ⲛⲛⲏ ⲉⲧϯ ⲉϧⲟⲩⲛ ⲉϩⲣⲁϥ ⲧⲁⲭⲁ ⲛⲧⲉ Ⲫⲛⲟⲩϯ ]- ⲛⲱⲟⲩ ⲛⲟⲩⲙⲉⲧⲁⲛⲟⲓⲁ ϧⲉⲛ ⲟⲩⲥⲏⲟⲩ ⲉⲑⲣⲟⲩⲥⲟⲩⲉⲛ ϯⲙⲉⲑⲙⲏⲓ. 26 Ⲟⲩⲟϩ ⲛⲧⲟⲩⲉⲣⲛⲩⲙⲫⲓⲛ ⲉⲃⲟⲗ ϩⲁ ⲡⲓⲫⲁϣ ⲫⲏ ⲉⲧⲁ ⲡⲓⲇⲓⲁⲃⲟⲗⲟⲥ ϫⲟⲣϫϥ ⲉⲣⲱⲟⲩ ⲉⲩⲣⲁⲟⲩⲏⲟⲩⲧ ⲛⲧⲟⲧϥ ⲙⲡⲉⲧⲉϩⲛⲁϥ ⲙⲫⲏ.